هذرولوجية نفسية ,,,

4 سنين درست علم نفس , ممكن أحكي إنو خلاني أتأمل أكثر من قبل بسلوكات الأشخاص إلي بحياتي أو حتى لي مرو وبمرو ورح يمرو بحياتي ,,, أو حتى الحيوانات ,,,

قبل 4 سنين ما كان بيعنيني كثير سبب لعب الأطفال وبنائهم لعالمهم الخاص وأنتباههم فقط لهالعالم وأستمتاعهم الشديد فيه ,,, وبالمقابل إنتباههم لعالم الكبار غير مهم
بل أحياناً مهمش , مو لانهم أصغر , بل بعيونهم هم غير وهم أكبر ,,,

أو آليات الدفاع الشخصية إلي بتكون عند كل إنسان ,,, مثل إنو شخص بالرغم من أختيارو الكامل بدخول إنسان معين لحياتو ومو أي إنسان , ومو أي حياة ومو أي تدخل , تدخل
كامل ومطلق بحياة نهايتها الموت ,,, برجع أحكي بالرغم من هالشي , إلا إنو آلية الدفاع بالتعامل مع هالإنسان بتكون شديدة جداً ,,, أنا ما بحكي هون عن أشخاص مكروهين ,
بالعكس , محبوبين بدرجة كبيرة ,,,

أو شو سبب إرتكاب الجريمة , شو تركيب العقل الإجرامي , تحليل الجريمة من ناحية فسيلوجية وسيكولوجية , الهرمونات والأعصاب ,,,

ليش بنوقف عند إشارة المرور لمن تكون الإشارة حمرا , وبنمشي لمن تصير خضرا ,,,

ليش بسيل لعابنا لمن ينذكر الأكل ,,,

أو حتى أبسط سؤال , ليش السما زرقا , والشجر أخضر , والتراب والرمل بدرجات البني ,,, ليه هالـ 3 ألوان بالذات , أكثر الألوان الموجودة على الكرة الأرضية ,,

و , و , و ... إلخ ....

وهون بيجي على بالي , أجيب هالكرسي وأقعد هناك بأعلى مكان , وبس أراقب هالأشخاص ,,,

السلوكات بحد ذاتها عالم أنتهى طريقو لبوابة العلم ,,, عالم رائع لكن متعب للتفكير ,,, وبالرغم من هالتعب إلا إنو في حاجة ملحة لمتابعة هالعالم ,,, أصبح الأمر شيء
لا شعوري , لا يمكن السيطرة عليه ,,,

.
.